求验客手记:各炒25次12码 美斯C朗打和

时间:2019-01-23

求验客手记:各炒25次12码 美斯C朗打和

尤文图斯星期一喺意甲主场以3:0轻松击败基尔禾,以九分优势继续排榜首,不过球王基斯坦奴朗拿度(C朗)今场唔单止冇入波,仲射失咗12码,追平埋美斯所射失慨12码次数纪录,大家都去到25次,Super!

C朗(7号)射失十二码,追平美斯射失十二码纪录。

3:0爆“基”艾基利照撑

祖记今场开波13分钟,就由杜格拉斯哥斯达慨远射先开纪录,完半场前再有安利简恩接应保罗戴巴拿慨助攻,射入转会后首个入波,帮祖记领先至2:0。换边后早段,基尔禾因有球员喺禁区犯手球被罚12码,不过C朗主射就俾对方门将苏兰天奴扑出,好彩祖记喺84分钟再有鲁加尼顶入,三分袋袋平安。

虽然C朗今场12码“宴客”,但教练艾基利赛后就继续力撑呢位葡萄牙球星,仲话呢场比赛唔重要,就算射失都冇所谓:“12码从来都唔包入,一样有机会射失!”艾基利又话,C朗可能心急想入波,所以发挥唔到最佳表现。C朗家阵以14个入波,同森多利亚慨加利亚雷拉、阿特兰大慨杜云沙柏达齐排意甲射手榜榜首,又难怪佢咁心急。

逃税出庭两亿有找

虽然艾基利话C朗12码宴客好小事,不过传媒就唔系咁睇喇,网媒《Bleacher Report》就统计咗C朗同佢宿敌美斯喺职业生涯射失12码慨次数(见附表),结果C朗139射有25次射失,而美斯108射亦射失25次。不过以百分比计,C朗慨命中率有82%,比美斯慨77%高少少,C朗又赢!

另外,C朗踢完场波后,翌日已经就关于佢涉嫌逃税单官司,飞去马德里上庭听审,仲带埋女友佐真娜一齐去。据报C朗同法庭达成协议,就佢被控喺2011至14年期间逃税高达1,470万欧元,家阵只要交出1,880万欧元(约1.68亿港元)慨罚款,就唔使受牢狱之灾,所以离开法庭时,佢都一样笑到四万咁口。