求验客手记:为辱对手阿嫲系**致歉 亨利输到慌

时间:2019-01-24

法甲老牌球会摩纳哥今季认真大镬,虽然球队近期又增兵又换帅,不过成绩依然冇乜起色,上个礼拜六法甲喺主场被斯特拉斯堡狂炒5:1继续深陷降班漩涡,教练亨利忍唔住嬲到要问候对方球员慨屋企人。到周二法足杯继续冇起色,再喺主场出击又系输波收场,1:3不敌梅斯出局。

摩纳哥喺法足杯虽有法比加斯(右),惜最终仍不敌梅斯出局。

摩纳哥场场被炒致失控

早几年仲系富豪球会慨摩纳哥今季疯狂星散,法宾奴泰华利斯、基达巴迪尔、汤马士林马同摩天奴等等踢得之人全部走晒,搞到球队要揾班预备组球员上嚟踢。虽然球队早排揾咗法国名宿亨利返嚟执教,亨利今个月又揾咗佢阿仙奴慨师弟法比加斯帮手,不过成绩都系冇乜起色,????家继续排喺联赛尾二。

摩纳哥喺上个礼拜六慨联赛主场对斯特拉斯堡,球队喺比赛早段打少一人慨情况下,半场落后1:2,喺呢个时候,亨利要爆喇。当比赛去到43分钟,亨利因为不满对方后卫坚尼拿拉拖延时间,喺场边破口大骂,仲侮辱坚尼拿拉个阿嫲系**。不过亨利咁躁都解决唔到问题慨,摩纳哥呢场最后都系要惨败1:5。

亨利赛后就为自己慨言论解释同道歉,指自己唔系想侮辱对手,只系球证执法不公先令佢失去理智咁话:“嗰句说话只系我一时情急之下慨反应,我为此感到后悔。我只系一个普通人,因为受到一连串慨事先影响到情绪。喺今场比赛中,助理球证曾经通知过球证四次对手系有犯规,不过球证并冇理会,呢件事真系令我好沮丧。”

PSG涉收集种族资料被罚

不过令到亨利更沮丧慨事陆续有嚟,摩纳哥喺礼拜二慨法国足总杯又输一仗,主场以1:3不敌梅斯。虽然摩纳哥今场都算精锐尽出,法卡奥、泰利文斯同法比加斯都有落场,其中法卡奥仲射入一球,不过最后都系难逃出局命运。

另一支法国富豪球会巴黎圣日耳门(PSG)最近都闹出丑闻,去年底就有法国传媒揭发PSG喺2013年至今,负责青训慨球探会喺球员慨评估当中加入种族同血统等资讯。有曾经效力PSG慨球探亦向传媒爆料,指球会唔想招募太多黑人球员。法甲联赛纪律委员会日前就裁定PSG收集慨资讯违反法国法律,决定向球会罚款10万欧元。不过委员会亦指出,虽然PSG慨行为违法,不过无证据显示球会收集呢啲资料同筛选球员或涉种族歧视有关。